ఆధునిక కాలంలో మారిన జీవనశైలి, అనారోగ్యకరమైన ఆహారం కారణంగా ఇటీవలి కాలంలో గుండె జబ్బులు విపరీతంగా పెరిగాయి. వృద్ధులలో ఎక్కువగా కనిపించే గుండెపోటు ఇప్పుడు యువత, పిల్లలలో కనిపిస్తుండటం ఆందోళన కలిగిస్తోంది.. ఈ తీవ్రమైన సమస్యను ఎదుర్కోవడానికి దాని లక్షణాలను ముందుగానే గుర్తించడం చాలా ముఖ్యమంటున్నారు వైద్య నిపుణులు.. గుండెపోటు రావడానికి దాదాపు నెల రోజుల ముందు మన శరీరంలో కొన్ని సంకేతాలు కనిపిస్తాయి. వాటిని సకాలంలో గుర్తించి చికిత్స తీసుకుంటే ప్రాణాలను కాపాడుకోవచ్చని సూచిస్తున్నారు.. ఆ లక్షణాలు ఏమిటి..? నిపుణులు ఏం చెబుతున్నారో ఈ కథనంలో తెలుసుకుందాం..
ఇటీవలి కాలంలో, వయస్సుతో సంబంధం లేకుండా చిన్నవారి నుంచి వృద్ధుల వరకు ప్రతి ఒక్కరినీ గుండెపోటు సమస్య వేధిస్తోంది. గుండెపోటు వచ్చే ముందు శరీరంలో కనిపించే లక్షణాలు ఇవే..
ఛాతీ, భుజం, దవడ నొప్పి:
గుండెపోటుకు ముందు కనిపించే ప్రధాన లక్షణాలలో ఒకటి ఛాతీ చుట్టూ ఒత్తిడి లేదా భారంగా ఉండటం. కొంతమందికి చేతులు, భుజాలు లేదా దవడలో నొప్పి కూడా రావచ్చు. ఈ సంకేతాలను విస్మరించకూడదు. మీకు అలాంటి లక్షణాలు కనిపిస్తే వెంటనే వైద్యుడిని సంప్రదించడం మంచిది.
శరీరంలో బలహీనత భావన:
మీరు ఎటువంటి శ్రమతో కూడిన పని చేయకుండానే త్వరగా అలసిపోయినట్లు.. బలహీనంగా అనిపించవచ్చు. ముఖ్యంగా ఈ లక్షణం పదే పదే సంభవిస్తే, అది గుండెపోటుకు ముందస్తు సంకేతం కావచ్చు. మీరు దీన్ని తేలికగా తీసుకోకూడదు.. వెంటనే వైద్యుడిని సంప్రదించాలి.
తలతిరుగుతున్న అనుభవం:
గుండెపోటుకు 30 రోజుల ముందు వరకు తలతిరగడం, కొన్నిసార్లు మూర్ఛపోవడం తరచుగా సంభవించవచ్చు. ఈ సమయంలో శ్వాస తీసుకోవడంలో ఇబ్బంది, తలనొప్పి, రక్త ప్రసరణ తగ్గడం వంటి లక్షణాలు కూడా సాధారణం. ఈ పరిస్థితి తీవ్రమైనది.. కాబట్టి మీరు వెంటనే వైద్యుడిని సంప్రదించాలి.
శ్వాస తీసుకోవడంలో ఇబ్బంది:
సాధారణ పనులు చేసిన తర్వాత లేదా శారీరక శ్రమ లేకుండా కూడా మీకు ఊపిరి ఆడకపోవడం అనిపిస్తే, అది గుండెపోటుకు సంకేతం కావచ్చు. గుండె రక్తాన్ని సరిగ్గా పంప్ చేయనప్పుడు ఈ సమస్య వస్తుంది.
పైన పేర్కొన్న ఈ లక్షణాలు కనిపిస్తే, వెంటనే వైద్య నిపుణులను సంప్రదించి చికిత్స తీసుకోవడం తప్పనిసరి. సకాలంలో జాగ్రత్తలు తీసుకోవడం వల్ల ప్రాణాలను కాపాడుకోవచ్చు.
మరిన్ని హెల్త్ వార్తల కోసం ఇక్కడ క్లిక్ చేయండి..
[