Movies about God: దక్షిణ భారత సినీ పరిశ్రమలో గత కొద్ది సంవత్సరాలుగా ఒక కొత్త ట్రెండ్ స్పష్టంగా కనిపిస్తోంది. భారీ బడ్జెట్‌లు, స్టార్ హీరోల గ్లామర్ పక్కనపెట్టి, ‘దేవుడు’ అనే అంశాన్ని ప్రధానంగా చేసుకున్న చిన్న సినిమాలు కూడా వందల కోట్ల వసూళ్లను సాధించి సంచలనం సృష్టిస్తున్నాయి. ఈ విజయాలు కేవలం ఆయా రాష్ట్రాలకే పరిమితం కాకుండా, పాన్ ఇండియా స్థాయిలో “పవర్ ఆఫ్ గాడ్ ఎఫెక్ట్” ను నిరూపిస్తున్నాయి.
– చిన్న బడ్జెట్.. భారీ కలెక్షన్స్
సాధారణంగా వందల కోట్ల క్లబ్‌లో చేరాలంటే భారీ బడ్జెట్‌తో పాటు స్టార్ హీరోల ఇమేజ్ అవసరమని భావించేవారు. కానీ ఈ ఆలోచనను ఈ మధ్య కాలంలో వచ్చిన కొన్ని సినిమాలు మార్చేశాయి.
‘కాంతారా’: కేవలం ₹14 కోట్ల బడ్జెట్‌తో కన్నడలో తెరకెక్కిన ఈ సినిమా, డబ్ అయిన ఇతర భాషల్లో కూడా ఊహించని విజయాన్ని సాధించి ₹450 కోట్లకు పైగా వసూలు చేసింది. ఈ సినిమా కన్నడ నటుడు రిషబ్ శెట్టిని ఒక్కసారిగా పాన్ ఇండియా స్టార్‌గా మార్చింది. ఈ సినిమాలో ప్రధానాంశం స్థానిక దైవం భూతకోలా.
‘హనుమాన్’: మెగాస్టార్ చిరంజీవి సినిమాల్లో బుడ్డోడి చిన్న పాత్రలు చేసిన తేజ సజ్జా.. చిరంజీవి కూడా ఇప్పటివరకూ కొట్టలేని ప్యాన్ ఇండియా మార్కెట్ ను కొల్లగొట్టాడు. హనుమాన్ పేరిట 40 కోట్ల బడ్జెట్ తో తీసిన ‘హనుమాన్’.. ప్యాన్ ఇండియా స్థాయిలో 350 కోట్లు సాధించి ఔరా అనిపించింది. ఓ కుర్ర హీరోను ప్యాన్ ఇండియా స్థాయికి చేర్చింది. ఈ సినిమా విజయానికి కారణం ప్రధానంగా హనుమంతుని పాత్రే.
‘మహావతార నరసింహ’: హీరో హీరోయిన్లు ఎవరూ లేకుండా, కేవలం AI, అనిమేషన్‌ల సాయంతో ₹15 కోట్లతో రూపొందిన ఈ సినిమా ₹260 కోట్లకు పైగా వసూలు చేసి అందరినీ ఆశ్చర్యపరిచింది. దీని విజయానికి కారణం ప్రధానంగా మహావతార నరసింహ అనే దైవ అంశమే.
మిరాయ్ : తాజాగా మిరాయ్ మూవీ.. కుర్రహీరో తేజా సజ్జా మరో దేవుడి కథాంశంతోనే మరో అద్భుతమైన విజువల్ ఎఫెక్ట్ తో మనముందుకు వస్తున్నాడు. ఈ మూవీ ట్రైలర్ తాజాగా విడుదలై అంచనాలు పెంచేసింది. అద్భుతమైన కథా కథనం.. దైవ భక్తి కనిపించింది. సో ఈ మూవీ కూడా హిట్ అందుకుంటుందన్న నమ్మకం ఏర్పడింది. ఈ మూవీకి దేవుడి కథనే మూలం కావడం గమనార్హం.
ఈ ఉదాహరణలు చూస్తుంటే, ప్రేక్షకులకు భక్తి, ఆధ్యాత్మికతతో కూడిన కథనాలు ఎంతగా నచ్చుతున్నాయో స్పష్టమవుతోంది.
ప్రేక్షకుల మనస్తత్వం.. భక్తి కోణం
నేటి ప్రేక్షకులు కేవలం వినోదం కోసం మాత్రమే థియేటర్‌లకు రావడం లేదు. వారికి వినోదంతో పాటు ఆధ్యాత్మికత, సంస్కృతి, విశ్వాసం కలిపిన కథనాలు అవసరమని ఈ సినిమాలు నిరూపించాయి. పౌరాణిక గాథలు, దేవుళ్ళ పాత్రల పట్ల యువతలోనూ ఆసక్తి పెరుగుతోంది. దీనికి ఆధునిక సాంకేతికత, విజువల్ ఎఫెక్ట్స్ తో కూడిన సినిమా రూపం తోడవ్వడం కలెక్షన్లకు మరింత బలాన్నిచ్చింది. సినిమా రూపంలో భక్తి, వినోదం రెండూ ఒకేసారి లభించడం కూడా ఈ విజయాలకు ఒక ముఖ్య కారణం.
“దేవుడు” – ఒక పాన్ ఇండియా కంటెంట్
దేవుని చుట్టూ తిరిగే కథలు భాషా అడ్డంకులను సులభంగా దాటేస్తాయి. ఉదాహరణకు, ‘హనుమాన్’ సినిమాలోని హనుమంతుడు తెలుగు ప్రేక్షకులకే కాకుండా దేశవ్యాప్తంగా ఉన్న కోట్లాది మందికి ఆరాధ్య దైవం. అదేవిధంగా, ‘కాంతారా’లోని భూతకోలా పూజ ఒక స్థానిక సంప్రదాయమైనా, దానిలోని ఆధ్యాత్మిక అనుభూతి దేశమంతా ఉన్న ప్రేక్షకులను ఆకట్టుకుంది. ఈ సినిమాలు పురాణాలను కేవలం కథలుగా కాకుండా, ఆధునిక సాంకేతికతతో ఒక అద్భుతమైన విజువల్ అనుభవంగా మార్చాయి.
– భవిష్యత్తు: “గాడ్ ట్రెండ్” యుగం
ఈ విజయాలను చూసిన తర్వాత, భవిష్యత్తులో మరిన్ని ఆధ్యాత్మిక, పౌరాణిక కథాంశాలతో సినిమాలు రావడం ఖాయం. అయితే కేవలం దేవుడి పేరుతో సినిమాలు తీస్తే సరిపోదు. కథ బలంగా ఉండాలి, విజువల్స్ ఆకట్టుకోవాలి, మరియు భక్తితో పాటు వినోదం సమపాళ్లలో మేళవించాలి. ఈ కొత్త “గాడ్ ట్రెండ్” దక్షిణ భారతదేశంలో మొదలైనప్పటికీ, ఇది త్వరలోనే బాలీవుడ్‌కు కూడా విస్తరించే అవకాశం ఉంది.
ఇప్పుడు బాక్సాఫీస్‌ను నడిపిస్తున్నది స్టార్ హీరోల గ్లామర్ కాదు, దైవశక్తి. “దేవుడి పేరు ఉంటే సినిమా ఫ్లాప్ అవ్వదు” అనే నమ్మకం సినీ పరిశ్రమలో పెరిగిపోతోంది. అందుకే ఇప్పుడు మనమంతా “పవర్ ఆఫ్ గాడ్ ఎఫెక్ట్” యుగంలో ఉన్నాం.