విభాగాల వారీగా షెడ్యూల్‌ ఖరారు
‘టెక్నికల్‌’ హైదరాబాద్‌లోనే నిర్వహణ
హాల్‌ టికెట్ల జారీపై త్వరలో ప్రకటన
పోలీస్‌ నియామక బోర్డు వెల్లడి
హైదరాబాద్‌, జనవరి 1 (ఆంధ్రజ్యోతి): రాష్ట్రం (Telangana)లో ఎస్సై(si), కానిస్టేబుల్‌ (Constable) నియామకాలకు సంబంధించిన రాత పరీక్షల షెడ్యూల్‌ ఖరారైంది. మార్చి 12వ తేదీ నుంచి రాత పరీక్షలు మొదలవుతాయని తెలంగాణ పోలీసు రిక్రూట్‌మెంట్‌ బోర్డు (Telangana Police Recruitment Board)(టీఎస్‌ఎల్‌పీఆర్‌బీ) ఆదివారం ప్రకటించింది. దీని ప్రకారం మార్చి 12 నుంచి ఏప్రిల్‌ 23 వరకు సివిల్‌ (Civil), ట్రాన్స్‌పోర్ట్‌ (Transport), ఎక్సైజ్‌(Excise), ఫింగర్‌ ప్రింట్‌ (Fingerprint) విభాగాల పోస్టులకు వేర్వేరుగా తుది రాత పరీక్షలను నిర్వహించనున్నారు. మార్చి 12న ఉదయం 10 గంటల నుంచి మధ్యాహ్నం ఒంటి గంట వరకు ఐటీ అండ్‌ కమ్యూనికేషన్‌ ఎస్సై అభ్యర్థులకు టెక్నికల్‌ పరీక్ష జరగనుంది. అదే రోజు మధ్యాహ్నం 2.30 నుంచి సాయంత్రం 5.30 గంటల వరకు ఫింగర్‌ ప్రింట్‌ ఎస్సై అభ్యర్థులకు టెక్నికల్‌ పరీక్ష ఉంటుంది. అలాగే మార్చి 26న ఉదయం ట్రాన్స్‌పోర్ట్‌ ఎస్సై అభ్యర్థులకు, ఏప్రిల్‌ 2న ఉదయం కానిస్టేబుల్‌ (డ్రైవర్‌) పోస్టులకు టెక్నికల్‌ పరీక్షలు జరగనున్నాయి. ఏప్రిల్‌ 2 మధ్యాహ్నం సెషన్‌లో కానిస్టేబుల్‌ మెకానిక్‌ అభ్యర్థులకు టెక్నికల్‌ పరీక్ష జరగనుంది. ఈ పరీక్షలన్నీ హైదరాబాద్‌(Hyderabad) కేంద్రంగానే జరగనున్నాయి.
ఇక, ఎస్సై రాత పరీక్షలో మొత్తం నాలుగు పేపర్లు ఉండగా.. ఏప్రిల్‌ 8న సివిల్‌, ఐటీ, ట్రాన్స్‌పోర్ట్‌ ఎస్సై, ఫింగర్‌ ప్రింట్‌ విభాగం ఏఎస్సై అభ్యర్థులకు మొదటి రెండు పేపర్లను నిర్వహించనున్నారు. ఉదయం సెషన్‌లో అర్థమెటిక్‌, రీజనింగ్‌, మధ్యాహ్నం ఇంగ్లీష్‌ పరీక్ష జరగనుంది. ఏప్రిల్‌ 9న ఉదయం సివిల్‌ ఎస్సై అభ్యర్థులకు మూడో పేపర్‌ జనరల్‌ స్టడీస్‌, మధ్యాహ్నం తెలుగు లేదా ఉర్దూ పరీక్షలు జరగనున్నాయి. ఎస్సై తుది పరీక్షలకు హైదరాబాద్‌, వరంగల్‌, కరీంనగర్‌లో పరీక్షా కేంద్రాలు ఏర్పాటు చేయనున్నారు. సివిల్‌, ట్రాన్స్‌పోర్ట్‌, ఎక్సైజ్‌ కానిస్టేబుల్‌ అభ్యర్థులకు ఏప్రిల్‌ 23 ఉదయం జనరల్‌ స్టడీస్‌ పరీక్ష నిర్వహించనున్నారు. అదేరోజు మధ్యాహ్నం ఐటీ అండ్‌ కమ్యూనికేషన్‌ కానిస్టేబుల్‌ అభ్యర్థులకు టెక్నికల్‌ పరీక్ష నిర్వహిస్తారు. కాగా పరీక్షల నిర్వహణకు అవసరమైన ఏర్పాట్లు చేస్తున్నామని టీఎ్‌సఎల్‌పీఆర్‌బీ చైర్మన్‌ వీవీ శ్రీనివాసరావు వెల్లడించారు. దేహదారుఢ్య పరీక్షలు జనవరి 5తో ముగియనున్నాయని, రాత పరీక్షల సంబంధించిన హాల్‌ టికెట్ల (Hall tickets) జారీపై త్వరలోనే ప్రకటన చేస్తామని తెలిపారు.
Updated Date – 2023-01-02T11:13:39+05:30 IST