వాషింగ్టన్ : ఉక్రెయిన్‌తో యుద్ధాన్ని కొనసాగించడంపై రష్యా అధ్యక్షుడు పుతిన్‌పై అమెరికా అధ్యక్షుడు డొనాల్డ్ ట్రంప్ అసంతృప్తి వ్యక్తం చేశారు. రెండో ప్రపంచ యుద్ధం తర్వాత అతిపెద్ద వివాదంగా ఈ యుద్ధాన్ని పేర్కొన్నారు. పుతిన్‌తో తనకు చాలా మంచి సంబంధాలున్నాయని, బహుశా ఇప్పటికే అలాగే ఉన్నాయని చెప్పుకొచ్చారు. పుతిన్ ఈ యుద్ధాన్ని ఎందుకు కొనసాగిస్తున్నాడో నాకు తెలియదని, కానీ యుద్ధం అంతమంచిది కాదని వ్యాఖ్యానించారు.
ఉక్రెయిన్ అధ్యక్షుడు జెలెన్‌స్కీతో సమావేశానికి ముందు ట్రంప్ వైట్‌హౌస్‌లో అర్జెంటీనా అధ్యక్షుడు జేవియర్ మిలేతో జరిగిన ద్వైపాక్షిక సమావేశం అనంతరం ఆయన విలేకరుల సమావేశంలో ట్రంప్ ఈ వ్యాఖ్యలు చేశారు. ఉక్రెయిన్ రష్యా యుద్ధం గత నాలుగేళ్లుగాజరుగుతోందని ఈ యుద్ధం వారం లోనే పూర్తి కావలసి ఉందని, రష్యా 1.50 లక్షల మంది సైనికులను కోల్పోయిందన్నారు.
ఇది భయంకరమైన యుద్ధమని, రెండో ప్రపంచ యుద్ధం తరువాత జరిగిన మరణాల పరంగా అతి పెద్ద సంఘటనగా పేర్కొన్నారు. తాను ఇప్పటివరకు ఎనిమిది యుద్ధాలను ఆపానని, ఈ యుద్ధాన్ని పూర్తిగా రష్యా, ఉక్రెయిన్ పరిష్కరించుకోవాలన్నారు. అర్జెంటీనా ఆర్థిక వ్యవస్థను ఆదుకునేందుకు ట్రంప్ 20 బిలియన్ డాలర్ల ఆర్థిక ప్యాకేజీని ప్రకటించారు. ఉక్రెయిన్‌కు టొమాహాక్ క్షిపణులను ఇవ్వడానికి అమెరికా ఆలోచిస్తుందన్నారు.