దిశ, బిజినెస్ బ్యూరో: ప్రభుత్వ రంగ టెలికాం సంస్థ భారతీయ సంచార్ నిగమ్ లిమిటెడ్ (బీఎస్ఎన్ఎల్) తన ‘ఫ్రీడమ్ ప్లాన్’ గడువును పొడిగిస్తున్నట్టు సోమవారం ప్రకటించింది. కస్టమర్ల నుంచి వస్తున్న భారీ స్పందనను దృష్టిలో ఉంచుకుని రూ. 1కే అపరిమిత సెవలను అందించే ఈ ప్లాన్‌ను సెప్టెంబర్ 15 వరకు 15 రోజులు పొడిగించినట్లు తెలిపింది. ఈ మేరకు కమ్యూనికేషన్ల మంత్రిత్వ శాఖ వెల్లడించింది. ఈ ఏడాది ఆగష్టు 1న తీసుకొచ్చిన ‘బీఎస్ఎన్ఎల్ ఆజాదీ కా ప్లాన్’ ద్వారా కస్టమర్లు దేశంలో తమ 4జీ సేవలను ఉచితంగా పొందడానికి వీలుగా తెచ్చినట్టు సంస్థ సీఎండీ ఎ రాబర్ట్ జె రవి చెప్పారు. రూ. 1కే తెచ్చిన ఈ ప్లాన్ ద్వారా సబ్‌స్క్రైబర్లు 30 రోజుల పాటు అపరిమిత వాయిస్ కాల్స్, రోజుకు 2జీబీ హై-స్పీడ్ 4జీ డేటా, 100 మెసేజ్‌లు పొందవచ్చు. మొదట దీన్ని ఆగష్టు 31 వరకు అందించినప్పటికీ, కస్టమర్ల నుంచి వస్తున్న ఆదరణ చూసి బీఎస్ఎన్ఎల్ గడువు పెంచింది.