ఐపీఎల్ 2025 విజేతగా నిలిచిన రాయల్ ఛాలెంజర్స్ బెంగళూరు ( ఆర్సీబీ ) విజయోత్సవ ర్యాలీ విషాదంగా ముగిసిన సంగతి తెలిసిందే. ఆ పరేడ్‌లో తొక్కిసలాట జరిగి 11 మంది ప్రాణాలు కోల్పోగా, 50 మందికి పైగా గాయపడ్డారు. దాదాపు మూడు నెలల పాటు ఈ ఘటనపై ఎలాంటి స్పందన చేయని ఆర్సీబీ, ఇప్పుడు మౌనం వీడింది. ఆర్సీబీ కేర్స్ పేరుతో అభిమానులకు అండగా ఉంటామని ప్రకటించింది. మరణించిన అభిమానుల కుటుంబాలకు ఆర్థిక సాయం అందించేందుకు మేనేజ్‌మెంట్ ముందుకొచ్చింది. బెంగళూరు చిన్నస్వామి స్టేడియం వద్ద జరిగిన తొక్కిసలాటలో 11 మంది అభిమానులు ప్రాణాలు కోల్పోయారు. అభిమానుల ప్రాణాలు వెలకట్టలేనివని, కానీ తమవంతు సాయంగా రూ. 25 లక్షలు అందిస్తున్నట్లు ఆర్సీబీ మేనేజ్‌మెంట్ ప్రకటించింది. ఈ మేరకు శనివారం అధికారికంగా తన సోషల్ మీడియాలో ప్రకటన కూడా విడుదల చేసింది. ఐపీఎల్ చరిత్రలో ఓ మాయని మచ్చలా మారిన ఈ ఘటనపై మూడు నెలలపాటు మౌనం పాటించిన ఆర్సీబీ, చివరికి శనివారం తమ అధికారిక సోషల్ మీడియా వేదికలో స్పందించింది. నిమన హృదయాలు జూన్ 4న ముక్కలయ్యాయి. ఆ రోజున మన ఆర్సీబీ కుటుంబంలోని 11 మందిని కోల్పోయాం. వారి లోటు ఎప్పటికీ పూడ్చలేనిది అనేది నిజం. కానీ మొదటి అడుగుగా, ప్రతి బాధిత కుటుంబానికి రూ. 25 లక్షల రూపాయల సాయం అందిస్తున్నాం. ఇది కేవలం ఆర్థిక సహాయం కాదు – మానవత్వానికి, ఏకత్వానికి ఇచ్చే వాగ్దానం అని ప్రకటనలో పేర్కొంది.
ఈ క్రమంలో ఆర్సీబీ కేర్స్ పేరుతో కొత్త ఆవిష్కరణను కూడా ప్రకటించింది. బాధిత కుటుంబాలకు ఆర్థిక సాయం మాత్రమే కాకుండా, భవిష్యత్తులో సమాజానికి ఉపయోగపడే పలు చర్యలు చేపట్టబోతున్నట్లు తెలిపింది. అయితే అభిమానులు, విమర్శకులు మాత్రం ఆలస్యంగా తీసుకున్న ఈ నిర్ణయాన్ని డ్యామేజ్ కంట్రోల్ ప్రయత్నమే అని నెట్టింట కామెంట్స్ చేస్తున్నారు. ఎందుకంటే, ప్రమాదం జరిగిన రోజున ఆర్సీబీ నుంచి ఓ చిన్న సంతాప సందేశం వచ్చినప్పటికీ, తరువాతి మూడు నెలలపాటు మౌనం కొనసాగింది. ఈ నిర్లక్ష్య వైఖరి కారణంగా బాధిత కుటుంబాలు మాత్రమే కాకుండా, అభిమానులు కూడా తీవ్ర అసంతృప్తిని వ్యక్తం చేశారు. కర్ణాటక ప్రభుత్వం అయితే స్పష్టంగా ఆర్‌సీబీనే నిర్లక్ష్యానికి బాధ్యురాలిగా నిలిపింది. పోలీసు దర్యాప్తులో ఇప్పటికే పలు అరెస్టులు చోటు చేసుకోగా, ఘటనపై కేసులు కొనసాగుతున్నాయి. ఈ ఘటన ప్రభావంతో ఐసీసీ మహిళల వన్డే వరల్డ్ కప్‌కి చిన్నస్వామి స్టేడియానికి ఇచ్చిన అనుమతులు కూడా రద్దయ్యాయి. బహుశా ఇకపై చిన్నస్వామి స్టేడియంలో ఎలాంటి అంతర్జాతీయ మ్యాచ్ జరిగే అవకాశాలు కూడా రద్దవ్వొచ్చని క్రికెట్ విశ్లేషకులు చెబుతున్నారు.