T20I Records: టీ20 హిస్టరీలోనే తోపు బౌలర్లు.. అన్ని ఓవర్లు మెయిడీన్లే.. దడ పుట్టించిన ముగ్గురు.. – Telugu News | From lockie ferguson to ayush shukla and saad bin jafar these 3 dangerous bowlers bowled all 4 overs maiden in t20i format

Cricket Records: క్రికెట్‌లో ఎప్పుడైనా, ఏ క్షణంలోనైనా ఏదైనా జరగవచ్చు. ఏ రికార్డ్ ఎప్పుడు బద్దలవుతుందో, ఎప్పుడు నమోదవుతుందో చెప్పడం కష్టమే. ఇక టీ20 క్రికెట్ గురించి చెప్పాల్సిన పనిలేదు. టీ20 క్రికెట్‌లో 4 మెయిడెన్ ఓవర్లు బౌలింగ్ చేయడం గురించి ఏ బౌలర్ కూడా ఆలోచించడం కష్టం. చాలా మంది దీనిని ఒక జోక్‌గా భావిస్తారు. కానీ ఈ 20-20 ఓవర్ ఫార్మాట్‌లో, ఈ అసాధ్యమైన రికార్డు కూడా నమోదైంది. టీ20 అంతర్జాతీయ క్రికెట్‌లో తమ కోటాలో 4 ఓవర్లను మెయిడెన్‌గా బౌలింగ్ చేసిన ముగ్గురు బౌలర్లు ప్రపంచంలో ఉన్నారు. ఇలాంటి ముగ్గురు బౌలర్లను ఓసారి చూద్దాం..

1. సాద్ బిన్ జాఫర్ (కెనడా): 2021 నవంబర్ 14న పనామాతో జరిగిన ఐసీసీ పురుషుల టీ20 ప్రపంచ కప్ అమెరికాస్ రీజియన్ క్వాలిఫైయర్ మ్యాచ్‌లో కెనడా ఎడమచేతి వాటం స్పిన్నర్ సాద్ బిన్ జాఫర్ తన 4 ఓవర్ల కోటాలోని 4 మెయిడెన్ ఓవర్లను బౌలింగ్ చేశాడు. సాద్ బిన్ జాఫర్ పనామాతో జరిగిన మ్యాచ్‌లో 4 మెయిడెన్ ఓవర్లు వేసి 4 ఓవర్లలో ఒక్క పరుగులే ఇవ్వకుండానే 2 వికెట్లు కూడా తీసుకున్నాడు. ఈ మ్యాచ్‌లో ముందుగా బ్యాటింగ్ చేసిన కెనడా జట్టు 20 ఓవర్లలో 1 వికెట్‌కు 245 పరుగులు చేసి పనామా ముందు 246 పరుగుల లక్ష్యాన్ని నిర్దేశించింది. దీనికి ప్రతిస్పందనగా, పనామా జట్టు 17.2 ఓవర్లలో 37 పరుగులకే కుప్పకూలింది. కెనడా 208 పరుగుల తేడాతో మ్యాచ్‌ను గెలుచుకుంది.

2. లాకీ ఫెర్గూసన్ (న్యూజిలాండ్): 2024 జూన్ 17న పాపువా న్యూ గినియాతో జరిగిన టీ20 ప్రపంచ కప్ మ్యాచ్‌లో న్యూజిలాండ్ ఫాస్ట్ బౌలర్ లాకీ ఫెర్గూసన్ తన 4 ఓవర్ల కోటాలోని 4 మెయిడెన్ ఓవర్లను బౌలింగ్ చేశాడు. లాకీ ఫెర్గూసన్ పాపువా న్యూ గినియాపై 4 మెయిడెన్ ఓవర్లు వేసి 4 ఓవర్లలో ఒక్క పరుగులే ఇవ్వకుండా 3 వికెట్లు కూడా పడగొట్టాడు. ఈ మ్యాచ్‌లో, పాపువా న్యూ గినియా జట్టు 19.4 ఓవర్లలో 78 పరుగులకు ఆలౌట్ అయింది. దీనికి ప్రతిస్పందనగా, న్యూజిలాండ్ జట్టు కేవలం 12.2 ఓవర్లలోనే లక్ష్యాన్ని చేరుకుంది. న్యూజిలాండ్ ఈ మ్యాచ్‌లో 46 బంతులు మిగిలి ఉండగానే 7 వికెట్ల తేడాతో విజయం సాధించింది.

3. ఆయుష్ శుక్లా (హాంకాంగ్): 2024 ఆగస్టు 31న మంగోలియాతో జరిగిన ఐసీసీ పురుషుల టీ20 ప్రపంచ కప్ ఆసియా క్వాలిఫయర్-ఏ మ్యాచ్‌లో హాంకాంగ్ మీడియం పేసర్ ఆయుష్ శుక్లా తన 4 ఓవర్ల కోటాలోని 4 మెయిడిన్ ఓవర్లను బౌలింగ్ చేశాడు. ఆయుష్ శుక్లా మంగోలియాపై 4 మెయిడిన్ ఓవర్లు వేసి 4 ఓవర్లలో ఒక్క పరుగులే ఇవ్వకుండానే 1 వికెట్ కూడా తీసుకున్నాడు. ఈ మ్యాచ్‌లో, మంగోలియా జట్టు 14.2 ఓవర్లలో 17 పరుగులకు ఆలౌట్ అయింది. దీనికి ప్రతిస్పందనగా, హాంకాంగ్ జట్టు కేవలం 1.4 ఓవర్లలోనే లక్ష్యాన్ని చేరుకుంది. ఈ మ్యాచ్‌లో హాంకాంగ్ 110 బంతులు మిగిలి ఉండగానే 9 వికెట్ల తేడాతో విజయం సాధించింది.