మానవతా సాయం పంపిణీపై ఇజ్రాయిల్‌ నిషేధం
టెల్‌అవివ్‌ : గాజా నగరాన్ని పూర్తిగా ఆక్రమించడానికి ఇజ్రాయిల్‌ సైన్యం సిద్ధమవుతోంది. ఇందులో భాగంగా గాజాను యుద్ధప్రాంతంగా ఇజ్రాయిల్‌ సైన్యం (ఐడీఎఫ్‌) ప్రకటించింది. నగరంలో మానవతా సహాయం పంపిణీని నిషేధించింది. ఈ చర్య ఇప్పటికే ఆకలితో అలమటిస్తున్న నగరంలోని వేలాది మంది ప్రజల ఇబ్బందులను మరింత పెంచనున్నది. గాజా నగరంలో సైనిక కార్యకలాపాలపై వ్యూహాత్మక నిషేధం ఇకపై వర్తించదని సైన్యం సోషల్‌ మీడియా పోస్ట్‌లో పేర్కొంది. ఈ ప్రాంతాన్ని ప్రమాదకరమైన యుద్ధ ప్రాంతంగా ప్రకటించింది. గాజా నగరం మినహా మిగిలిన ప్రాంతంలో స్థానిక వ్యూహాత్మక బ్లాక్‌లు అమలులో ఉంటాయని ఐడీఎఫ్‌ తెలిపింది. ఇజ్రాయిల్‌ పౌరులను రక్షించడానికి గాజాలోని ఉగ్రవాద గ్రూపులపై వారు దాడులు నిర్వహిస్తారని ఐడీఎఫ్‌ తెలిపింది. గాజాలోని పదిలక్షల మంది జనాభాలో సగం మంది ఆశ్రయం పొందారు. గ్లోబల్‌ హంగర్‌ మానిటర్‌… గాజా నగరంతో పాటు పరిసర ప్రాంతాలు ఇప్పుడు అధికారికంగా కరువును ఎదుర్కొంటున్నాయని తెలిపింది. మరింత పెరిగే అవకాశం ఉంటుందని పేర్కొంది. ఇంటిగ్రేటెడ్‌ ఫుడ్‌ సెక్యూరిటీ ఫేజ్‌ క్లాసిఫికేషన్‌ సిస్టమ్‌ ప్రకారం.. 5,14,000 మంది ప్రజలు కరువుకు ప్రభావితమవుతున్నారు. ఈ సంఖ్య సెప్టెంబర్‌ చివరి నాటికి 6,41,000 మందికి పెరిగే అవకాశం ఉందని అంచనా వేసింది. అయితే, ఇజ్రాయిల్‌ ఈ నివేదికను తోసిపుచ్చింది. అంచనాలు తప్పని.. నివేదిక అంతా పక్షపాతంతో కూడుకున్నదని పేర్కొంది. సర్వే అసంపూర్ణ సమాచారాన్ని మాత్రమే తీసుకుందని ఇజ్రాయిల్‌ వాదిస్తోంది. ఇది ఎక్కువగా హమాస్‌ నుంచి వచ్చిందని.. ఇటీవల ఆహార ధాన్యాలు గాజాకు చేరుకున్నాయని అందులో ప్రస్తావించలేదని తెలిపింది.
