RCB : రాయల్ ఛాలెంజర్స్ బెంగళూరు (RCB) పదిహేడేళ్ల సుదీర్ఘ నిరీక్షణ తర్వాత 2025లో ఇండియన్ ప్రీమియర్ లీగ్ (IPL) టైటిల్‌ను గెలుచుకుంది. జూన్ 3న అహ్మదాబాద్‌లో జరిగిన ఫైనల్‌లో పంజాబ్ కింగ్స్‌ను ఓడించి ఆర్‌సీబీ ఛాంపియన్‌గా నిలిచింది. దీంతో ఆ జట్టు సొంతగడ్డ బెంగళూరులో అభిమానులు ఆనందోత్సాహాలతో మునిగిపోయారు. కానీ, ఈ ఆనందం ఎక్కువసేపు నిలవలేదు. జూన్ 4న బెంగళూరులో ఆర్‌సీబీ విక్టరీ పరేడ్ సందర్భంగా జరిగిన తొక్కిసలాటలో 11 మంది ప్రాణాలు కోల్పోగా, 50 మంది గాయపడ్డారు. ఈ విషాదంపై ఆర్‌సీబీ మూడు నెలల తర్వాత స్పందిస్తూ.. సోషల్ మీడియాలో ఒక ఎమోషనల్ పోస్ట్ చేసింది. “జూన్ 3న మాకు చాలా ఆనందం కలిగింది, కానీ జూన్ 4న అన్నీ మారిపోయాయి” అని ఆ పోస్ట్‌లో రాసుకొచ్చింది.
ఆర్‌సీబీ పోస్ట్‌లో ఏముంది?
ఆర్‌సీబీ తన సోషల్ మీడియాలో చేసిన పోస్ట్‌లో.. మేము మౌనంగా ఉన్నామంటే, అది మేము లేనట్లు కాదు. అది మా బాధ. ఈ స్థలం ఎప్పుడూ అభిమానుల ఉత్సాహం, జ్ఞాపకాలు, ఆనందకరమైన క్షణాలతో నిండి ఉండేది. కానీ జూన్ 4 తర్వాత అన్నీ మారిపోయాయి. ఆ రోజు తర్వాత ఇక్కడ నిశ్శబ్దం ఆవరించింది. ఈ నిశ్శబ్దంలో మేము బాధపడ్డాం, విన్నాం, నేర్చుకున్నాం. క్రమంగా మేము కేవలం ఒక స్పందన ఇవ్వడం కంటే.. ఏదో ఒక మంచి పని చేయాలని నిర్ణయించుకున్నాం. ఇప్పుడు మేము నిజంగా నమ్మే ఒక పనిని చేయబోతున్నాం”
ఆ పోస్ట్‌లో ఆర్‌సీబీ ఇంకా “ఈ ఆలోచనతోనే ఆర్‌సీబీ కేర్స్ (RCB CARES) పుట్టింది. ఇది మా అభిమానులకు గౌరవం ఇవ్వడానికి, వారి బాధను తగ్గించడానికి, వారికి అండగా ఉండటానికి పుట్టింది. ఇప్పుడు మేము విజయాన్ని మాత్రమే కాదు, మా అభిమానులను కూడా ముందుకు తీసుకువెళతాం. కర్ణాటకకు గర్వం కలిగించేలా ఆర్‌సీబీ కేర్స్, మేము ఎల్లప్పుడూ ఇలాగే చేస్తూ ఉంటాము.” జూన్ 4న జరిగిన తొక్కిసలాటలో మరణించిన వారి కుటుంబాలకు ఆర్‌సీబీ అప్పటికే రూ. 10 లక్షల చొప్పున సహాయం అందించింది.
మరిన్ని క్రీడా వార్తల కోసం ఇక్కడ క్లిక్ చేయండి..