భారత్‌పై అమెరికా 25శాతం కస్టమ్స్‌ సుంకాలు విధింపు వేళ మరో కీలక పరిణామం చోటుచేసుకుంది.
ఇరాన్ చమురు ఉత్పత్తుల కొనుగోలు, మార్కెటింగ్‌ చేయడం అనే కారణంతో, ప్రపంచవ్యాప్తంగా 20 కంపెనీలపై ఆంక్షలు విధించినట్లు వాషింగ్టన్‌ ప్రకటించింది. ఈ సంస్థలలో భారత్‌కు చెందిన ఆరు కంపెనీలు కూడా ఉండటం గమనార్హం. అమెరికా విదేశాంగ శాఖ తాజాగా ఈ విషయాన్ని అధికారికంగా ప్రకటించింది.
టెహ్రాన్‌పై ఆర్థిక ఒత్తిడిని పెంచేందుకు అమెరికా ఈ కఠిన నిర్ణయం
ఇరాన్ చమురు విక్రయాల ద్వారా వచ్చిన ఆదాయాన్ని మధ్యప్రాచ్యంలో ఉద్రిక్తతలు, అస్థిరతలకు ఉపయోగిస్తుంది. అంతేకాకుండా, ఈ నిధుల ద్వారా ఉగ్రవాద సంస్థలకు ఆర్థిక మద్దతు అందిస్తోంది. దీని వల్ల ప్రపంచ శాంతికి హానికరం కలుగుతోంది. అందువల్లే టెహ్రాన్‌పై ఆర్థిక ఒత్తిడిని పెంచేందుకు అమెరికా ఈ కఠిన నిర్ణయం తీసుకుంది. ఇరాన్ చమురు, పెట్రోకెమికల్‌ ఉత్పత్తుల కొనుగోళ్లకు సహకరిస్తున్న 20 సంస్థలపై ఆంక్షలు అమలు చేస్తున్నాం అని అగ్రరాజ్యం తమ ప్రకటనలో స్పష్టం చేసింది.
ఇరాన్ ఉత్పత్తులను కొనుగోలు చేసే ఏ సంస్థైనా అమెరికా ఆంక్షలు ఎదుర్కొక తప్పదు
భారత్‌తో పాటు యునైటెడ్ అరబ్‌ ఎమిరేట్స్‌ , తుర్కియే, ఇండోనేషియా దేశాల కంపెనీలు కూడా ఈ ఆంక్షల జాబితాలో ఉన్నాయి. అధ్యక్షుడు డొనాల్డ్ ట్రంప్‌ స్పష్టం చేసినట్లే, ఇరాన్ ఉత్పత్తులను కొనుగోలు చేసే ఏ సంస్థైనా అమెరికా ఆంక్షలు ఎదుర్కొక తప్పదు. అంతేకాదు, వారు ఇకపై అమెరికాతో వాణిజ్య సంబంధాలు కలిగి ఉండే అర్హతను కోల్పోతారు అని వాషింగ్టన్‌ ఈ సందర్భంగా హెచ్చరించింది.
అమెరికా ఆంక్షలు విధించిన భారత కంపెనీల వివరాలు ఇలా ఉన్నాయి:
- కాంచన్‌ పాలిమర్స్‌ : 2024 ఫిబ్రవరి నుంచి జులై మధ్య కాలంలో, యూఏఈలోని ఒక మధ్యవర్తిత్వ సంస్థ నుంచి 1.3 మిలియన్ డాలర్ల విలువైన ఇరాన్ పాలిథీన్‌,ఇతర పెట్రోకెమికల్‌ ఉత్పత్తులను దిగుమతి చేసుకున్నదని అమెరికా ఆరోపించింది.
- ఆల్‌కెమికల్‌ సొల్యూషన్స్‌ : ఇది ఓ పెట్రోకెమికల్‌ ట్రేడింగ్ కంపెనీ. 2024 జనవరి నుంచి డిసెంబర్ మధ్య, మొత్తం 84మిలియన్ డాలర్ల విలువైన ఇరాన్ ఉత్పత్తులను దిగుమతి చేసుకున్నట్టు అమెరికా తెలిపింది.
- రమణిక్‌లాల్ ఎస్ గోసాలియా అండ్ కంపెనీ: 2024 జనవరి నుంచి 2025 జనవరి వరకు,ఈ సంస్థ 22 మిలియన్ డాలర్ల విలువైన మిథనాల్‌, టోల్యూన్‌, ఇతర పెట్రోకెమికల్‌ ఉత్పత్తులను ఇరాన్ నుంచి కొనుగోలు చేసిందని ఆరోపణలున్నాయి.
అమెరికా ఆంక్షలు విధించిన భారత కంపెనీల వివరాలు ఇలా ఉన్నాయి:
- జుపిటర్ డై కెమ్ ప్రైవేట్ లిమిటెడ్ : 2024-25 కాలంలో ఈ కంపెనీ 49 మిలియన్ డాలర్లకు పైగా విలువైన ఇరాన్ ఉత్పత్తులను దిగుమతి చేసుకుందన్న సమాచారం ఉంది.
- గ్లోబల్ ఇండస్ట్రియల్ కెమికల్స్ లిమిటెడ్ : గతేడాది కాలంలో 51 మిలియన్ డాలర్ల పెట్రోకెమికల్‌ ఉత్పత్తులను ఇరాన్ నుంచి కొనుగోలు చేసింది అని అమెరికా ఆరోపిస్తోంది.
- పర్సిస్టెంట్ పెట్రోకెమ్ ప్రైవేట్ లిమిటెడ్: ఈ సంస్థ గతేడాది 14 మిలియన్ డాలర్ల విలువైన మిథనాల్‌తో సహా ఇతర ఇరాన్ ఉత్పత్తులను దిగుమతి చేసిందని అమెరికా అభియోగం వేసింది.
అమెరికాలో ఆస్తులు ఉంటే..
ఈ ఆరు కంపెనీలన్నీ ఉద్దేశపూర్వకంగా ఇరాన్‌తో వాణిజ్యంలో పాల్గొన్నాయని వాషింగ్టన్‌ వ్యాఖ్యానించింది.
తాజా ఆంక్షల నేపథ్యంలో, ఇప్పుడు ఆయా కంపెనీలు, వ్యక్తులకు అమెరికాలో ఆస్తులు ఉంటే వాటిని ఫ్రీజ్‌ చేస్తారు.