తమన్నా ప్రధాన పాత్రలో నటించిన చిత్రం ‘ఓదెల 2’. సూపర్‌ నేచురల్‌ థ్రిల్లర్‌ ‘ఓదెల రైల్వే స్టేషన్‌’కి ఇది సీక్వెల్‌. ఈ చిత్రాన్ని పాన్‌-ఇండియా స్థాయిలో రూపొందిస్తున్నారు. సంపత్‌ నంది కథ, స్క్రీన్‌ప్లే, డైలాగ్‌ రైటర్‌గా మల్టిపుల్‌ రోల్స్‌లో వర్క్‌ చేశారు. అలాగే డైరెక్షన్‌ సూపర్‌ విజన్‌ని అందిస్తున్నారు. అశోక్‌ తేజ ఈ చిత్రానికి దర్శకుడు. మధు క్రియేషన్స్‌, సంపత్‌ నంది టీమ్‌వర్క్స్‌ బ్యానర్స్‌ పై డి. మధు నిర్మిస్తున్నారు. ఇటీవల ముంబైలో జరిగిన గ్రాండ్‌ ఈవెంట్‌లో మేకర్స్‌ థియేట్రికల్‌ ట్రైలర్‌ను లాంచ్‌ చేశారు.ఈ సందర్భంగా హీరోయిన్‌ తమన్నా మాట్లాడుతూ,’ఈ సినిమా నాకు చాలా ప్రత్యేకం. ఇలాంటి సినిమాలు ఒక యాక్టర్‌కి చాలా అరుదుగా వస్తుంటాయి. ఈ సినిమాలో పార్ట్‌ కావడం ప్రౌడ్‌గా ఫీల్‌ అవుతున్నాను. సంపత్‌ నంది ఈ సినిమాలో నా పాత్రని రాసిన విధానం చాలా అద్భుతంగా ఉంటుంది. ఇలాంటి అద్భుతమైనటువంటి కథలో నన్ను పార్ట్‌ చేసిన ఆయనకు కతజ్ఞతలు తెలుపుతున్నాను. వశిష్ట సింహ చాలా అద్భుతమైన నటుడు. ఈ సినిమాల్లో తన పాత్ర టెర్రిఫిక్‌గా ఉంటుంది. గాడ్‌ వర్సెస్‌ ఈవిల్‌ ఫైట్‌ని తన పెర్ఫార్మన్స్‌తో మరో స్థాయికి తీసుకు వెళ్లాడు. ఈ సినిమాలో నేను చేసిన శివశక్తి పాత్రకు ఎలాంటి రిఫరెన్స్‌ లేదు. ఇంత మంచి క్యారెక్టర్‌ పోషించడం చాలా అదృష్టంగా ఫీలవుతున్నాను. ఈ సినిమా కోసం నేచర్‌ కూడా మాకు సపోర్ట్‌ చేసిందని నమ్ముతున్నాం. ఈ సినిమా నాకు చాలా డిఫరెంట్‌ జర్నీ. ఇది గ్రాండ్‌ స్కేల్‌ కమర్షియల్‌ ఫిల్మ్‌. ఈ సినిమా అందరికీ నచ్చుతుందనే నమ్మకం ఉంది’ అని అన్నారు.
‘తమన్నా ఈ సినిమాలో శివశక్తి పాత్రని మరో స్థాయిలో చేశారు. సినిమా కోసం చాలా హార్డ్‌ వర్క్‌ చేశారు. మండుటెండలో చెప్పులు లేకుండా నడిచారు. ఈ సినిమా తర్వాత ఆమెకు డిఫరెంట్‌ రోల్స్‌ వస్తాయి. ఆమె కోసం పాత్రలు క్రియేట్‌ అవుతాయి. ప్రేక్షకులకి ఈ సినిమా గ్రేట్‌ సినిమాటిక్‌ ఎక్స్‌పీరియన్స్‌ ఇస్తుంది. ఈనెల 17న థియేటర్స్‌లో సినిమా చూడండి. ఖచ్చితంగా బ్లాస్టింగ్‌ ఎక్స్‌పీరియన్స్‌ ఉంటుంది’ అని సంపత్‌ నంది చెప్పారు. వశిష్ట సింహ మాట్లాడుతూ,’ఇది చాలా పవర్‌ ఫుల్‌ మూవీ. నిర్మాత మధు ఈ సినిమాని చాలా బిగ్‌ స్కేల్‌లో తీశారు. తమన్నా ఈ సినిమాలో చేయబోయే మ్యాజిక్‌ చూడబోతున్నారు. నేను నటించిన ‘కేజిఎఫ్‌’ మాస్‌ ఎక్స్‌పీరియన్స్‌. ఈ సినిమా ఒక డివైన్‌ ఎక్స్పీరియన్స్‌లా ఉండబోతుంది’ అని తెలిపారు.
