ABN
, Publish Date – Apr 09 , 2025 | 04:33 AM
అమెరికా అధ్యక్షుడు డొనాల్డ్‌ ట్రంప్‌, ఆయన సన్నిహితుడు ఎలాన్‌ మస్క్‌ మధ్య చెడిందని సమాచారం. ట్రంప్‌ విధించిన ప్రతీకార సుంకాలే ఇరువురి మధ్య అభిప్రాయ విబేధానికి కారణమని…
ఇరువురి నడుమ సుంకాల మంట!!
టారి్‌ఫలు వద్దన్న టెస్లా అధిపతి
అధ్యక్షులవారు మాత్రం ససేమిరా..
న్యూఢిల్లీ: అమెరికా అధ్యక్షుడు డొనాల్డ్‌ ట్రంప్‌, ఆయన సన్నిహితుడు ఎలాన్‌ మస్క్‌ మధ్య చెడిందని సమాచారం. ట్రంప్‌ విధించిన ప్రతీకార సుంకాలే ఇరువురి మధ్య అభిప్రాయ విబేధానికి కారణమని ఓ అమెరికన్‌ మీడియా సంస్థ కథనం పేర్కొంది. సుంకాలు విధించ వద్దని మస్క్‌ ఎంత చెప్పినా ట్రంప్‌ వినలేదట. ఆ విషయంలో వెనక్కి తగ్గేది లేదని టెస్లా అధిపతికి అధ్యక్షుల వారు ఖరాఖండిగా తేల్చి చెప్పేశారట. సుంకాల దెబ్బకు తన సంపద భారీగా తరిగిపోవడంతో పాటు టెస్లా కార్ల కంపెనీ భవిష్యత్‌పై నీలినీడలు కమ్ముకోవడంతో పెద్దన్నపై మస్క్‌ గుర్రుగా ఉన్నట్లు తెలుస్తోంది.
ప్రతీకార సుంకాలకు తాను వ్యతిరేకమని మస్క్‌ చెప్పకనే చెప్పారు. గత వారంలో ట్రంప్‌ సుంకాలు ప్రకటించిన కొద్ది సేపటికే ప్రముఖ అమెరికన్‌ ఆర్థికవేత్త, నోబెల్‌ గ్రహీత మిల్టన్‌ ఫ్రైడ్మాన్‌ స్వేచ్ఛా వాణిజ్యంపై మాట్లాడుతున్న వీడియోను మస్క్‌ సామాజిక మాధ్యమాల్లో పోస్ట్‌ చేయడమే ఇందుకు నిదదర్శనం. అంతేకాదు, యూర్‌పతో సుంకాలు లేని వాణిజ్యం నెరపాలని కోరారు. అయితే, సుంకాలపై మస్క్‌ వైఖరిని ట్రంప్‌ వాణిజ్య సలహాదారు పీటర్‌ నవారో తీవ్రంగా విమర్శించారు. ప్రస్తుతం మస్క్‌, నవారో మధ్య మాటల యుద్ధమే కొనసాగుతోంది. మస్క్‌, వైట్‌హౌ్‌సకు మధ్య అగాధం పెరిగిందన్న వార్తలను ఇది మరింత బలపరుస్తోంది.
మస్క్‌ సంపదలో రూ.11.61 లక్షల కోట్లు ట్రంపార్పణం: ట్రంప్‌ సుంకాల దెబ్బకు మస్క్‌ సంపద ఈ ఏడాదిలో 13,500 కోట్ల డాలర్ల (రూ.11.61 లక్షల కోట్లు) మేర తరిగిపోయి ప్రస్తుతం 30,000 కోట్ల డాలర్ల దిగువకు (రూ.25.80 లక్షల కోట్లు) పడిపోయింది. గత గురు, శుక్రవారాల్లోనే మస్క్‌ నెట్‌వర్త్‌ 3,100 కోట్ల డాలర్ల మేర క్షీణించింది. సోమవారం నాడు మరో 440 కోట్ల డాలర్ల ఆస్తిని కోల్పోయారు.
Updated Date – Apr 09 , 2025 | 04:34 AM
