మిడిల్‌ ఈస్ట్‌లో అమెరికా అధ్యక్షుడు డొనాల్డ్‌ ట్రంప్ సైనిక చర్యను ప్రారంభించారు. ఎర్ర సముద్రంలో జరిగే షిప్పింగ్‌పై దాడులు చేస్తున్న మెమెన్‌లోని హౌతీలను ఏరివేసేందుకు ఈ మిలటరీని దింపారు. ఇరాన్ సహకారంతో యెమెన్‌లో ఈ హౌతీలు రెచ్చిపోతున్నారు. రెండో సారి అధికారం చేపట్టిన ట్రంప్.. హౌతీల వేటను ప్రారంభించారు. ఇప్పటికే 24 మందిని హతమార్చినట్లు సమాచారం. ఈ దాడులతో టెహ్రాన్‌పై ఆంక్షల ఒత్తిడిని పెంచేలానే ఉద్దేశంతో ట్రంప్ ఈ నిర్ణయం తీసుకున్నారు. అలాగే హౌతీలపై ఈ సైనిక చర్య మరికొన్ని వారాల పాటు కొనసాగే అవకాశం ఉన్నట్లు సమాచారం.
అసలు ఎవరీ హౌతీలు?
ఇటీవలె వచ్చిన ఎన్టీఆర్‌ సినిమా దేవర చూశారా? ఆ సినిమాలో ఎర్ర సముద్రంపై దొంగతనానికి వెళ్లి, షిప్పులపై దాడి చేసిన సరుకును దొచేస్తూ ఉంటారు. అలాగే ఈ హౌతీలు కూడా సముద్రంలోనే షిప్పులపై దాడులు చేసి.. షిప్పింగ్‌ను అడ్డుకోవడానికి ప్రయత్నిస్తుంటారు. 1990ల చివరలో, యెమెన్‌కు ఉత్తరాన ఉన్న హౌతీ కుటుంబం, ఒకప్పుడు యెమెన్‌ను పాలించిన షియా ఇస్లాంకు చెందిన జైదీ శాఖ కోసం ఒక మతపరమైన పునరుజ్జీవన ఉద్యమాన్ని ప్రారంభించింది. కానీ వారి ఉత్తర కేంద్ర ప్రాంతం పేదరికం కారణంగా వారి ఉద్యమం అణగదొక్కబడింది. రాజధాని సనాలో ప్రభుత్వంతో ఘర్షణ పెరిగేకొద్దీ, వారు జాతీయ సైన్యంతో వరుస గెరిల్లా యుద్ధాలు, సున్నీ ముస్లిం సౌదీ అరేబియాతో క్లుప్తమైన సరిహద్దు వివాదంలో పాల్గొన్నారు. అబ్దుల్ మాలిక్ అల్-హౌతీ.. హౌతీల నాయకుడిగా ఉన్నాడు. హౌతీ ఉద్యమ నేతగా ఎదగడానికి ముందు అల్-హౌతీ ఒక భయంకరమైన వార్‌ కమాండర్‌గా ఖ్యాతిని సంపాదించాడు.
40 ఏళ్ల వయసున్న అల్-హౌతీ దర్శకత్వంలో, ఈ బృందం పదివేల మంది యోధులతో కూడిన సైన్యంగా ఎదిగింది. సాయుధ డ్రోన్లు, బాలిస్టిక్ క్షిపణుల భారీ ఆయుధాగారాన్ని సంపాదించింది. వీరికి ఈ ఆయుధాలు ఇరాన్ నుంచి సరఫరా అవుతున్నాయని.. సౌదీ అరేబియా, పశ్చిమ దేశాలు ఆరోపిస్తున్నాయి. అయితే టెహ్రాన్ మాత్రం వారి ఆరోపణలను ఖండించింది. ఈ అల్-హౌతీ ఎప్పుడూ ఒక చోట ఉండడు, మీడియాను అస్సలు కలవడు, అలాగే బయట ఎక్కువ తిరగడు. 2014 చివరలో హౌతీలు సనాను ఆక్రమించుకున్నప్పుడు యెమెన్‌లో అంతర్యుద్ధం చెలరేగింది. ఇరాన్ సరిహద్దులో పెరుగుతున్న ప్రభావంతో ఆందోళన చెందిన సౌదీ అరేబియా 2015 మార్చిలో పాశ్చాత్య దేశాల మద్దతుగల సంకీర్ణ కూటమికి నాయకత్వం వహించింది. హౌతీలు ఉత్తరాన పెద్ద నగరాల్లో నియంత్రణను ఏర్పరచుకున్నారు. అయితే ఐక్యరాజ్యసమితి జరిపిన చర్చల కారణంగా యెమెన్ కొంతకాలం ప్రశాంతంగా ఉంది, కానీ గాజా యుద్ధం ప్రారంభమైనప్పటి నుండి ప్రాంతీయ ఉద్రిక్తతలు తీవ్రంగా పెరగడం వల్ల మిలీషియా, రియాద్ మధ్య కొత్త సంఘర్షణ పెరిగే ప్రమాదం ఉంది.
షిప్పులపై దాడులు ఎందుకు?
పాలస్తీనియన్లు, గాజాను నియంత్రించే ఇస్లామిక్ గ్రూపు హమాస్‌కు మద్దతుగా ఎర్ర సముద్రంలోని షిప్పింగ్ మార్గాలపై దాడులతో హౌతీలు గాజా వివాదంలో జోక్యం చేసుకున్నారు. అడెన్ గల్ఫ్, అరేబియా సముద్రం, హిందూ మహాసముద్రం, మధ్యధరా సముద్రంలో ఇజ్రాయెల్‌తో సంబంధం ఉన్న నౌకలపై దాడులు చేసినట్లు కూడా వారు పేర్కొన్నారు. హౌతీ దాడులు ప్రపంచ షిప్పింగ్‌కు అంతరాయం కలిగించాయి. దీంతో షిప్పింగ్ కంపెనీలు దక్షిణాఫ్రికా చుట్టూ తిరిగి వచ్చేలా షిప్పులను నడిపాయి. దీంతో ఎక్కువ సమయం వృథా అవ్వడంతో పాటు ఖర్చు కూడా భారీగా పెరిగింది. ఇజ్రాయెల్, అమెరికా, బ్రిటన్‌లతో సంబంధాలున్న ఓడలపై మాత్రమే దాడి చేసినట్లు మిలీషియా చెప్పినప్పటికీ, అన్ని ఓడలు ప్రమాదంలో ఉన్నాయని షిప్పింగ్ పరిశ్రమ వర్గాలు చెబుతున్నాయి. ప్రపంచ షిప్పింగ్ ట్రాఫిక్‌లో దాదాపు 15 శాతం వాటా కలిగిన యూరప్, ఆసియా మధ్య కీలక మార్గంలో స్వేచ్ఛా వాణిజ్య ప్రవాహాన్ని పునరుద్ధరించడానికి అంతర్జాతీయ ప్రయత్నాల్లో భాగంగా అమెరికా, బ్రిటన్ హౌతీలపై వైమానిక దాడులతో ప్రతీకారం తీర్చుకుంటున్నాయి. జనవరిలో గాజా కాల్పుల విరమణతో పాటు సాపేక్ష ప్రశాంతత ప్రారంభమైంది, కానీ మార్చిలో ఇజ్రాయెల్ గాజాకు వచ్చే సహాయాలను అడ్డుకోవడంతో మార్చి 12న హౌతీలు తక్షణమే దాడులను పునఃప్రారంభిస్తున్నట్లు ప్రకటించారు.
హౌతీలకు ఇరాన్ తో ఉన్న సంబంధాలు ఏమిటి?
హౌతీలు “యాక్సిస్ ఆఫ్ రెసిస్టెన్స్” అని పిలువబడే దానిలో భాగం. ఇరాన్ మద్దతుతో హమాస్, హిజ్బుల్లా, హౌతీలతో సహా ప్రాంతీయ మిలీషియాల ఇజ్రాయెల్ వ్యతిరేక, పాశ్చాత్య వ్యతిరేక కూటమిగా ఏర్పడ్డాయి. అమెరికా, ఇజ్రాయెల్‌ను నాశనం చేయడమే హౌతీల లక్ష్యం. సౌదీ నేతృత్వంలోని సంకీర్ణ కూటమి.. హౌతీలకు టెహ్రాన్ ఆయుధాలు, శిక్షణ ఇస్తోందని ఆరోపిస్తోంది. లెబనాన్‌లోని ఇరాన్ మద్దతుగల హిజ్బుల్లా హౌతీలకు సహాయం చేస్తోందని కూడా సంకీర్ణ కూటమి చెబుతోంది. ఇరాన్ హౌతీలను సమర్థిస్తుండగా, హౌతీలు ఇరాన్ కీలుబొమ్మలుగా ఉండటాన్ని ఖండిస్తున్నారు.
మరిన్ని అంతర్జాతీయ వార్తల కోసం ఇక్కడ క్లిక్ చేయండి.